14‏/01‏/2017


اولاً VPN = Virtual Private Network
 
الترجمة الحرفية ليها هي شبكة افتراضية خاصة .. دلوقتي انت عندك في العمارة الواد زيزو عنده راوتر و انت واخد منه واصلة او سلك عشان تحطه في الكمبيوتر بتاعك و تشغل النت عندك .. انت كده واخد النت بتاعك من الواد زيزو فـ لو عملت اي مصيبة هيقبضوا علي زيزو عشان الراوتر عنده هو و هو صاحب الراوتر,
الـ VPN نفس الحوار بقي .. انت بتكون واخد الـ serverr اللي مشغل بيه النت بتاعك من بلد تانية خالص, زي ما انت كنت مشغل النت بتاعك من شقة تانية خالص غير شقتك " مشغله من عند زيزو " يعني مثلاً لما انت تكون متصل VPN Server برة مصر .. من فرنسا مثلاً فـ انت كده اكنك قاعد في مصر بس الرواتر بتاعك في فرنسا, و بالتالي الـ IP بتاعك هيكون في فرنسا,
.
يعني ايه الـ IP بتاعك من فرنسا ده و ايه لازمته ؟ 
مش انت دلوقتي لو دخلت علي googlee و كتبت " حالة الطقس " هتلاقيه جابلك حالة الطقس في القاهرة " او المحافظة اللي انت منها " .. طيب ايه ده انت قولتله حالة الطقس بس هو عرف منين انك من القاهرة و جابلك حالة الطقس بتاعت المنطقة اللي انت فيها ؟ عرف من الـ iP بتاعك .. و بالتالي لما انت تكون متصل VPN Server من فرنسا الـ IP بتاعك هيكون في فرنسا يعني لو دخلت علي الـ youtube هيجبلك الـ youtube بتاع فرنسا و google بتاع فرنسا و كل حاجة بتاعت فرنسا عشان انت باين قدامه من الـ ip بتاعك انك من فرنسا 
.
طيب برضو انا هستفاد ايه من الحوار ده لما اكون واخد نت من فرنسا ؟
خليني افاجئك الاول و اقولك ان انت كـ مستخدم فـ مزود الخدمة بتاعك سواء كانت te-dataa او vodafone او whatever الشركة اللي انت مشترك فيها مقابل انك تاخد نت .. فـ هي مش بتديك السرعة بتاعتك كاملة, لا بتاخد جزء منها بس و ده بسببين و هما,
1-
السرعة الكلية للنت بيتعملها Sharee في السنترالات لكل المستخدمين و بالتالي بتتجزء علي كل واحد مشترك و انت بتاخد نصيب صغير منها
2-
ان الـ serverss دي كل ما عدد المستخدمين عليها بيزيد و يزيد الحمل عليها بتبدأ تبطئ في تنفيذ الطلبات اللي انت بتطلبها, يعني لما تكوني انتِ جايبه راوتر ليكي انتِ و سارة بس, غير ما يكون ليكي انتِ و سارة و هدير و ندي و شيماء و اسراء و آيه و حنين و كلهم دخلوا google و كتبوا " العاب تلبيس بنات ولا العاب مكياج " , اكيد كل ما عدد المستخدمين علي الرواتر بيزيدو كل ما السرعة بتبطئ لكل مستخدم فيهم .. نفس الموضوع في الـ servers اللي انت بتاخد منها النت في السنترالات بقي
.
طيب انت مازلت مش عارف انت هستفاد ايه برضو من الـ VPN ؟
لو انت متصل بـ VPN Serverr فـ انت ملكش دعوة بكل العك اللي بيحصل في السنترال ده و لا شيماء و اسراء و حنين و مهما عدد المستخدمين و الحمل علي الـ server يزيد فـ انت التصفح عندك سريع و بتاخد سرعتك كاملة تقريباً و ملكش دعوة ... بس كده ؟ 
.
 
لا كمان لو الحكومة بتاعت بلدك كيوت زي حكومة مصر كده و قررت تعاملك كـ عبد و تفرض عليك سُلطتها و خلت مزود الخدمة بتاعتك te-data مثلاً خلتها تقفل كام موقع بحجة الامن العام ولا اي حجة من بتوعهم زي ما حصل في 25 يناير لما شركات النت في مصر عملوا proxy و قفلوا الـ Facebook و مواقع تانية .. فـ انت لو متصل بـ VPN Server هتقدر تخش علي المواقع اللي قفلوها دي عادي و كمان الاتصال بتاعك بالنت هيكون مُشفر .. ليه بقي ؟
 
بالظبط كده .. عشان انت واخد النت بتاعك من فرنسا فـ ملكش دعوة بـ اللي بيحصل في مصر ولا اللي مزودين الخدمة بيعملوا في مصر
.
طيب الـ VPN ده فيه منه انواع ولا اشكال ولا اي حاجة ؟
اه طبعاً ليه ( Protocols = بروتوكولات ) كتير زي
IPSEC
OpenVPN
PPTP
و البروتوكول PPTP بيشتغل علي اي نظام زي windows و linux .. إلخ
.
تعالي نتكلم بشكل تقني شوية بقي و اعرفك آلية عمل الـ VPN
 
اتخيل معايا كده ماسورة مية كبيرة جواها مواسير كتير صغيرة, كل ماسورة من المواسير الصغيرة دي بتنقل المية في شقة .. اتصالك بالنت بقي عبارة عن ماسورة كبيرة و كل أمر انت بتدخله ليه ماسورة صغيرة مخصصة جوه الماسورة الكبيرة بيمشي فيها.. هفهمك اكتر
.
 
انت دلوقتي واد مقطع السمكة و ديلها و بتكلم سارة علي النت و بتكلمها سكايب كمان يعني كتابة و صوت و صورة و مظبط نفسك علي الاخر يعني, تعالي نقول ان سكايب ليه 3 مواسير صغيرين علي الاقل جوه الماسورة الكبيرة, ماسورة لنقل المحادثة الكتابية وماسورة لنقل الصوت وماسورة لنقل الصورة, يعني و انت بتثبت سارة و بعتلها ايموشن قلب, اهو الايموشن ده مشي في الماسورة الخاصة بنقل المحادثة الكتابية, و لما هي بعتتلك صورتها و هي لابسة الاسدال فـ الصورة دي مشيت في الماسورة بتاعت الصور .. و لما انت بعتلها صوتك و انت بتقولها بحبك يا بت, الصوت ده مشي في الماسورة الخاصة بالصوت
.
 
و بما ان احنا اتفقنا نتكلم بشكل تقني فـ الماسورة الكبيرة هنا نقصد بيها " الاتصال بالانترنت " و الماسورة الصغيرة نقصد بيها ( port = منفذ ) .. طيب و الماسورة الكبيرة دي " الاتصال بالانترنت " جواها كام ماسورة صغيرة " كام Port " ؟
الاتصال بالانترنت يا سيدي فيه 65535 بورت = Port
و كل بورت خاص بحاجة زي مثلاً بورت رقم 80 خاص بـ HTTP و بورت 80800 خاص بـ HTTPS و هكذا ..
.
الـ VPN بيعمل ايه بقي وسط كل البورتات و الليلة دي كلها ؟
الـ VPNN بياخد كل الطلبات بتاعتك اللي بتطلبها زي مثلاً عايز تتصفح موقع كذا ولا اي طلب و بيعمل حاجة اسمها PORT Tunneling و بيبعت كل الطلبات دي لبورت خاص و في الغالب بيكون البورت رقم 443 و بعدين الـ Server ياخد الطلبات دي و ينفذلهالك و يرجعها للجهاز بتاعك علي نفس البورت برضو, و ده قمة الاعجاز العلمي !
.
طيب لو فيه واحد مبيحبش رقم 443 و عايز الـ VPN يعمل عملية الـ PORT Tunnelingg مع بورت تاني غير بورت 443 .. ينفع ؟ 
 
اه ينفع يغير البورت ده عادي بس بشرط ان البورت اللي هيغيره ليه ده ميكنش بتاع حاجة تانية, يعني مينفعش يغيره للبورت رقم 80 مثلاً عشان البورت ده بتاع HTTP و هكذا
..
.



0 التعليقات:

إرسال تعليق