17‏/06‏/2020




المقالة بالعامية ، الهدف من المقالة وعي للبنات ومش لازم كلام فصحي :) 

في الاول خالص خليني احكيلك إشمعنا التيليجرام ولية مش فيسبوك او انستا حتي ، تطبيق التيليجرام هو تطبيق تراسل فوري عادي جداً زي غيرة من التطبيقات بس مميز انه مفتوح المصدر جزئياً يعني شبه ملوش كبير :( وشغال علي اغلب الاجهزة وكمان بيدعم صيغ كتير من الملفات الي بيتم مراسلتها ، من ناحية الأمان فجميع الرسائل مشفرة تماماً ولايمكن للحكومات او الأشخاص بإختراقها ، ومن ناحية الخصوصية بيحافظ عليها بشكل تام ، وأتسس في 2013 بواسطة اشخاص روس * شاركو في منصة VK الي بيتقال علية الفيسبوك الروسي * ومقر الشركة في المانيا .
الفئات المسيطرة علي التيليجرام ؟ الشركات ، الاكاديميات التعليمية ، المتطرفين ، مروجي الاباحية الشاذة ها الشاذة زي الاطفال وغيرها ، تجار السوق السوداء ( دي الفئات المسيطرة مش تقولي اسماء بتاعت الفطير المشلتت والسمنة البلدي الي عاملة جروب وبتشير منتجات ولا اختها بتاعت ماي واي وبتنزل المجلة ) .
لية بيستخدمو التطبيق ده مؤخراً ؟ سياسية التيليجرام سياسية جبر خاطر يعني لو قدمنا بلاغ علي 5 قنوات ممكن يتقفل منهم 1 مثلاً ، وبيستخدمو التطبيق ده لانهم بيديهم مساحة من الحرية والنظام ، الحرية انه يقدر يمسح الرسالة اي وقت بدون ميظهر اي اشعار ان في حاجة إتمسحت ، النظام انه يظبط وينسق محتواه كأن القناة مدونة ، الخصوصية في التطبيق بتساعدة انة يعمل كل حاجة هوا عايزها .. وحكومات العالم بتعرف تتعامل برضو علي حسب كل حالة ودرجة خطورتها .
لسة في هكر ؟ عالفيسبوك حالياً مفيش الكلام دة نظراً لسياسية وأمان الفيسبوك فعملية الاختراق بتم بحاجة بإستخدام تطبيق او رابط شبية بصفحة الفيسبوك او بقي حد يكون شغال في شركة اتصالات يسحب الخط بتاعك ويسترجع كلمة السر ، لكن فكرة اني اتصل بيك برقم وترد اخترقك ده بلح ، فكرة اني اتصل بيك برقم برايفت نمبر مأجرة من سكايب واقولك انا اخترقتك بلح برضو .. وبالمناسبة صور جروب المنصورة دي مش صور منشورة عالاكونت دي مبعوتة بمنتهي إردتها لواحد صاحبنا بتاع ( يا بت انتي مراتي ) فمنشتغلش بعض ونبي .
طيب بيجيبو الصور منين بتاعت البنات ؟ ننسي فكرة الهاك دي لان حالياً الضحية بيبقي عارف انه بيتهاك ازي سواء ابلكيشن سوشيال او ابلكيشن حملة علي الجهاز ، فالصور بتتجاب منين ؟! صور ومقاطع فيديو بتبعتها الضحية لشخص ما فيختلفو علي حاجة ما فايبنشرها علي سبيل التهديد ، او علي سبيل الانتقام معتقدش فكرة الربح دي بصراحة لان الي بيكون غرضة ربح مش هيجازف بشخصيتة ، فبتوصل الصور دي لشخص ما بيستغلها في تحقيق ربح ! .. فيحقق الربح ازي واللينكات دي بتتحذف والاكونت اتقفل انتهاك معايير علي الفيسبوك فيقوم عامل قناة علي التيليجرام او بيشترك في منتديات اباحية.
طيب ازي الحكومة بتتصرف في الحالة دي ؟ وزارة الداخلية المصرية بتعرف تسيطر تماماً علي الحاجات دي وقطاع مباحث الانترنت عندة إمكانيات رهيبة حرفياً وعقول شبابية ممتازة سواء ظباط او اشخاص بيتم انتادبهم للمساعدة التقنية ، فعلي سبيل المثال لو الصور او المقاطع علي موقع اباحي بيتم مراسلة الموقع بحذف المحتوي بسبب كذا ( 70% من المواقع الاباحية بتيح الخيار ده تحت كل فيديو تقدر تبلغ بنفسك لو حابب ) ، طب لو تيليجرام هيجبوة ازي ! اعتقد ان مفيش حد هيضحي بوقتة ببلاش فبيتم التواصل مع اصحاب الموقع المرفوع عليها الملف بغرض الربح ، الموقع الي تم اختصار الرابط فية لغرض الربح وبيقدرو من خلال وسيلة الدفع التعرف علي الجاني .
طيب انا بخاف اهلي تعرف لما اقدم البلاغ ؟ اهلك مش هيعرفو حاجة بس متكونيش عاملة قناة علي تطبيقات زي لايكي و تانجو وبتعرضي محتوي جنسي وتروحي تعملي بلاغ ان في واحد سجلك الايف في الروم السري ونشرة علي النت ، وبيتم التعامل بشكل خاص جداً وتقديم إستثناءات للاشخاص المضرورين .
ازي احمي نفسي ؟  نخفي بيانتنا الشخصية علي مواقع التواصل الاجتماعي ونخفي الصور بتاعتنا مش لازم يعني العالم كلة يشوف فستانك الجديد :) ، متدخليش علي اي رابط يتبعت ليكي ، متحمليش اي تطبيق مشبوة ، اي ملفات مضغوطة بحجم قليل .. متبعتيش صورك لحد يختي ( بصوت مبروك عطية )